राजगडमध्ये पाणीटंचाईवर जाहीर सुनावणी; प्रशासनाला थेट जाब, तातडीच्या उपाययोजनांचे आदेश

राजगडमध्ये पाणीटंचाईवर जाहीर सुनावणी; प्रशासनाला थेट जाब, तातडीच्या उपाययोजनांचे आदेश

राजगड तालुक्यात वाढत्या पाणीटंचाईच्या पार्श्वभूमीवर पंचायत समितीच्या आवारात पार पडलेली तालुकास्तरीय आढावा बैठक यंदा वेगळ्या पद्धतीने पार पडली. पारंपरिक औपचारिकतेला फाटा देत ही बैठक जनतेसमोर जाहीर सुनावणीच्या स्वरूपात घेण्यात आली. यामुळे नागरिकांना थेट प्रश्न मांडण्याची संधी मिळाली आणि प्रशासनाला तत्काळ उत्तर देणे भाग पडले.

बैठकीस सभापती सौ. सुवर्णाताई किरण राऊत, उपसभापती श्री. संदीपभाऊ खुटवड, जिल्हा परिषद सदस्य श्री. अमोलदादा नलावडे, श्री. तानाजीबाप्पू मांगडे, पंचायत समिती सदस्य सौ. सिताताई खुळे यांच्यासह प्रांताधिकारी, तहसीलदार, गटविकास अधिकारी आणि विविध विभागांचे अधिकारी उपस्थित होते. शेतकरी, ग्रामस्थ आणि तरुणांनी मोठ्या संख्येने हजेरी लावून पाणीटंचाईबाबतच्या अडचणी मांडल्या.

या बैठकीत अनेक गावांमधील पाणीपुरवठ्याची अनियमितता, टँकर व्यवस्थापनातील त्रुटी, तसेच अपुऱ्या पायाभूत सुविधांवर गंभीर चर्चा झाली. नागरिकांनी अधिकाऱ्यांना थेट जाब विचारत तातडीने उपाययोजना करण्याची मागणी केली. “पाणीटंचाई ही नैसर्गिक आपत्ती नसून व्यवस्थापनातील त्रुटींचा परिणाम आहे,” असा स्पष्ट संदेश या वेळी देण्यात आला.
भोर-राजगड-मुळशी मतदारसंघाचे आमदार मा. श्री. शंकरभाऊ मांडेकर यांच्या नेतृत्वाखाली झालेल्या या बैठकीत प्रशासनाला ठोस निर्देश देण्यात आले. टँकरद्वारे नियमित पाणीपुरवठा, विहिरी व जलस्रोतांची तात्काळ दुरुस्ती, तसेच दीर्घकालीन जलयोजना राबविण्याबाबत अधिकाऱ्यांना सूचना करण्यात आल्या.
बैठकीचा शेवट करताना लोकप्रतिनिधींनी स्पष्ट शब्दांत इशारा दिला की, पाणीटंचाईबाबत कोणतीही हलगर्जीपणा सहन केला जाणार नाही. नागरिकांच्या मूलभूत गरजांकडे दुर्लक्ष करणाऱ्या संबंधितांवर कारवाई करण्यात येईल, असेही सांगण्यात आले.